Mir händ üs hüt da im Hirsche troffe
mit Bus und Auto, oder isch öpper gloffe?
Ihr wüssed sicher dass ich gern tue dichte
drum möcht ich jetzt über dies und das na brichte.
Letscht Wuche – wo ich um d’Waldegg bin gloffe
han ich im Wald dä Samichlaus atroffe
Er wöll mir na öppis uf dä Weg mitgeh
Er heig da einiges vernoh und gseh.
Ich hoffe Ihr verstönd hüt au echli Spass
uf dä Samichlaus isch ebe Verlass.
Er heig drum vo zwei schwatzhafte Fraue ghört
das die andere Turnerinne öppe echli stört.
Er wöll dene zwei Dame es Schächteli überlah
die werded das denn sicher scho verstah?
Kauft heig dä Chlaus das zwar für di chline Chind
Drum die mit eme spezielle Sujet sind.
Chönd ihr’s wohl errate gar ?
Es isch Gina und Stamenka klar!
Ei Frau in üserer Gruppe möchte ich erwähne – das isch nöd neu
hät Turnstunde bi dä Gaby bsuecht fleissig und treu.
Sie isch scho sit viele Jahre i dem Bewegigs – Club derbi
doch gaht au bi ihre s’Alter nöd spurlos verbi.
I dä letschte Jahre hät sie immer emal wieder müesse ufs Turne verzichte.
mängsmal muess mer sich halt nach dä Gsundheit richte.
Liebi Rosalina, du häsch viel müesse ushalte und liede
und doch bisch Du immer ufgstellt und zfriede blibe.
Mir freued üs drum hüt scho grad
wenn Du wieder chunsch go turne is Heinrichsbad.
Ich dörf dir en süesse Gruess vom Chlaus na bringe
Er meint, Gaby werdi sicher na eis singe
Liebi Gaby
Dä Grund für mis Gedicht isch dis Jubiläum – das Jahr
scho 30 Jahr bisch Du Seniore-Turnleiterin – es isch wahr.
Immer guet vorbereitet jedi Stund
und Abwechslig ibaue mit guetem Grund.
Absenze i dä Adressliste dokumentiere
Und sofort immer s‘Geld i kassiere.
Das alles isch mit viel Ufwand und Arbet verbunde
so schaffs Du für dis Hobby au Über – Stunde.
Geld i triebe und nachher au na zelle
Pro Senectute hät das für Zuekunft andersch welle.
Mir Tuner/inne findet das doch guet und vernünftig
Dini Turnstunde sind ja wahrlich günstig.
Dass Du nöd ganz ufs Geld verzichte muesch
Jetzt halt die Schoggibatze zelle tuesch.
Es isch ja alles nur zu dinere Entlastig denkt
Pro Senectute üs gar 2 Stund drüber na schenkt.
Du bisch e echti Power Frau
Nimm‘sch alles penibel, gnau
Poulet- Esse und Wiehnachtsanläss programmiere
und Seniore-Turner-Usflüg organisiere.
Au Guetzli bache und anders meh
So cha mer dich immer aktiv gseh.
Turnstunde eröffne mit singe
und dänn grad scho d‘ Arme schwinge.
Muskle und Bänder lockere und trainiere
und au Glenk und Hirn aktiviere.
Alles wird zum Lockere mit Musik begleitet
und jedesmal na zwei Witz vorbereitet.
Denn heisst‘s au emal Achsle bewege
und abwechselnd Bei hochhebe.
Liebi Gaby Anatomie isch so en Sach
Du weisch ja, da bin ich echli vom Fach.
Achsle- au als Axilla beannnt
isch wohl mit dä Schultere verwandt.
D’Schultere isch drum s‘ beweglichst Glenk
aber nöd z‘verwechsle mit dä Achlse denk!
D’Achsle isch vo dä Schultere nur en winzige Bereich
chasch mers glaube, ich verzell kein Seich.
Drum du das Wort us dim Voccabulaire striche muesch
denn au kei Unsicherheite uslöse tuesch.
Dini Turngruppe 2 vom Heinrichsbad möcht Dir na öppis schenke
dass Du i Zuekunft immer a dis Jubiläum tuesch denke.
Viellicht als Trophäe ufs Büechergstell,
nei abstaube muesch es nöd so schnell.
es isch nützlich – Du chasch es au bruche –
bi schönem Wetter und bim ruche.
Es isch es Chäsmesser samt Gravur denn grad
Und dä Chäs mit Brettli liegt au scho parat.
Damit du das Ding grad scho chasch teste
und mit dinere Familie au ghörig feschte.
S’Brot muesch selber go poschte,
weisch es tuet alles en huufe choste!
Jetzt gib ich aber Rueh und schwiege
mir chönd ja nachli zum plaudere blibe.
Jetzt wünsch ich eu allne es schöns Wiehnachtsfescht
mit dä Familie und andere Gescht.
Fürs neu Jahr Glück und Zfriedeheit
und immer au gueti Gsundheit.
Drum sind mir denn alli froh
wenn mir im neue Jahr wieder dörfed zäme cho.
Drum schenk ich eu zum Schluss na es Liecht:
Ein Licht, in dem die Hoffnung funkelt
wenn um Euch herum das Leben dunkelt.
Ein Licht, das all die traurigen Gedanken vertreibt
und euren Tränen ein guter Begleiter bleibt.
Ein Licht, das Eure Sorgen schwinden lässt
und der Kummer etwas verblasst.
Ein Licht, das Eure Wege erhellt und
Euer Tun niemals in den Schatten stellt.
Ich schenke Euch drum dieses Licht,
das Eure Zeit bescheint und es gut
mit Euch und der Zukunft meint.
